മാന്നാർ കുറ്റിയിൽ ജംഗ്ഷനിൽ നിന്ന് ചെന്നിത്തല തൃപ്പെരുന്തുറ റോഡിൽ 1 കി.മി. സഞ്ചരിക്കുമ്പോൾ റോഡിന്റെ തെക്കുഭാഗത്ത് വിഷവർശ്ശേരിക്കരയിൽ പുരാതനമായ ഊരുമഠം ദേവീക്ഷേത്രം സ്ഥിതിചെയ്യുന്നു. ക്ഷേത്രത്തിൽ പടിഞ്ഞാറ് ദർശനമായി ഭദ്രകാളി പ്രതിഷ്ഠയാണ് . ധാരിക നിഗ്രഹാനന്തരം കോപത്തോടെയാണ് ദേവി ഇവിടെ ഇരിയ്ക്കുന്നതെന്നു വിശ്വാസമുണ്ട്. ക്ഷേത്രത്തിന്റെ ഉല്പത്തികാലത്തെപ്പറ്റിയുള്ള സൂചനകൾ ഒന്നും ലഭ്യമല്ല. പണ്ട് ചോളമൺ മഠത്തിന്റെ ഉടമസ്ഥതയിലായിരുന്നു ക്ഷേത്രം ഇപ്പൊൾ വിഷവർശ്ശേരിക്കര എൻ .എസ്. എസ് ( നമ്പർ 2293 ) കരയോഗത്തിൻെ അധിനതയിലാണ്. ദേവീപ്രതിഷ്ഠ പടിഞ്ഞാറു ഭാഗത്തേക്കായത് കിഴക്കോട്ട് തിരിഞ്ഞാൽ ദേവിയ്ക്ക് ശക്തികൂടുമെന്ന സങ്കല്പമാണ്. ദേവിയുടെ കോപം ശമിക്കുവാൻ പരമശിവൻ ദേവിയെ പടിഞ്ഞാറേക്ക് പിടിച്ച് തിരിച്ച് ഇരുത്തിയതിന് കാരണം സഹോദര ഭാവേന നേരേ അങ്ങേക്കരയിൽ സുബ്രഹ്മണ്യൻ ഉള്ളതുകൊണ്ടാണ്. ഊരുമഠം ദേവീക്ഷേത്രത്തിന് നേരെ പടിഞ്ഞാറ് സുബഹ്മണ്യസ്വാമിക്ഷേത്രം സ്ഥിതിചെയ്യുന്നു. ഉണ്ണിനീലി സന്ദേശത്തിൽ ഊരുമഠം ദേവീക്ഷേത്രത്തെക്കുറിച്ച് സൂചിപ്പിച്ചിട്ടുള്ളതായി കാണാം. കടമറ്റത്ത് കത്തനാരുമായി ബന്ധപ്പെടുത്തി ഒരു ചൊല്ല് പറയുന്നത് നാട്ടി പിടിച്ച നാട്ടാളം (വിഷവർശ്ശേരിക്കര പടിഞ്ഞാറ് പുഞ്ച) ഒറ്റിപിടിച്ച ഒറ്റാർകാവ്, കണ്ടുപിടിച്ച കണ്ണങ്കര, ഊരിപിടിച്ച ഊരുമഠം, പറ്റി പിടിച്ച പനയന്നാർകാവ്, കടമറ്റത്തു കത്തനാർ യക്ഷിയെ പിടിക്കുന്നത് പലപ്രാവശ്യം ഈ പ്രദേശങ്ങളിലൂടെയാണെന്നും ഒടുവിൽ പനയന്നാർ കാവിൽ ദേവിയുടെ സഹായത്താൽ യക്ഷിയെ അവിടെ കുടിയിരുത്തിയിരിക്കുന്നതായും ചരിത്രം.